Градоначалникот Никола Бакрачески денес на терен утврдуваше до каде и како се одвиваат градежните активности за асфалтирање на патот од селото Вапила до селото Сирула кое започна пред околу 10 дена. За овој краток временски период, патот речиси е целосно тампониран, а се очекува асфалтирањето да започне идната недела. Проектот опфаќа реконструкција во должина од 1 700 метри и изработка на нов пат во должина од 2 700 метри. Рокот на изведба на работите ќе биде два месеци.
Проектите за асфалтирање на патот од Вапила до Сирула и за асфалтирање на улиците во село Косел, се двата проекти за кои општина Охрид доби зелено светло од Агенцијата за финансиска поддршка на руралниот развој, а се дел од програмата на Локалната самоуправа за развој на руралните средини.
Вкупната вредност на двата проекти изнесува 23 милиони и 500 илјади денари.
Надвор од овој проект ќе биде интервенирано и на санирање на ударните дупки на патот од село Косел до село Вапила и од Вапила до Ливоишта, до целосна изградба на потполно нов пат кон овие населени места што се планира за понатака.
